သတိရခြင်းကို ပေါင်ထားခဲ့တယ်
မျက်ရည်တွေသာ တအိအိနဲ့တက်လာတယ်
ချစ်ခြင်း မုန်းခြင်းအပြိုင် လေလံဆွဲချိန်
အလွမ်းတွေက အတိုးသတ်နိုင်ရုံလေးတင်။
ဒီမှာ “ကို”
ဒီဇင်ဘာက လှပလွန်းခဲ့တယ်
ဆောင်းတွင်းမက်တဲ့ အိပ်မက်က
ကယောင်ခြောက်ခြားဆိုလည်း
“ကို” ပါတဲ့ အိပ်မက်ဆို
အကြိမ်တစ်သောင်းမက မက်ရဲခဲ့တယ်။
အပြုံးလေးနဲ့ မိတ်ဆက်ခဲ့တဲ့နေ့
အပြုံးလေးနဲ့လမ်းခွဲခဲ့တဲ့နေ့
ဒီဇင်ဘာထိပ်စီးတူပေမဲ့
သက္ကရာဇ်နောက်ဆုံးဂဏန်းလေးလွဲတော့
၂ နှစ်တာ နာကျင်မှုနဲ့ တမ်းတမှုက
ဆုံးရှုံးခြင်းဆိုတဲ့အပေါင်ဆိုင်ထိပ်မှာ ခေါင်းငုံ့ရင်းပေါ့။
သတိရပါလို့မတောင်းဆိုဘူး
ဒါမဲ့ “ကို့”ဘေးနားက တစ်ဘဝစာဆိုတဲ့
သူမကိုတော့ နာကျဉ်းမိတယ်။
ပြန်လာပါလို့မတောင်းဆိုဘူး
ဗလာပဲ ပါလာမယ့် နှလုံးသားထဲမှာ
သံယောဇဉ်လက်ကျန်တွေနဲ့
လက်ပစ်မကူးချင်တော့ဘူး။
April
17.Apr.2017
10:00 PM
